Ni Hailey Rochine Mendoza
Edit ni Albert Lagrimas
Sa makabagong panahon ng digital media, paano nga ba natin magagamit ang wikang Filipino upang makabuo ng makabuluhan at responsableng komunikasyon? Ito ang pangunahing tanong at layuning sinagot sa Agora na inorganisa ng klase ng Fil111A o Lìka-Likhâ: Sining ng Content Crfeation mula sa block ng Fil111A-4 at 6 noong Setyembre 24 sa Room 401 at 25 sa PLDT Hall, parehong gusali ng ACB. Bitbit nito ang temang: “Sipat at Suri: Ang Papel ng Bagong Henerasyon Bilang Edukampeyon sa Content Creation.”
Sa kasaysayan ng sinaunang Gresya, ginagawa ang Agora noon bilang sentral na pampublikong espasyo. Dito nagtitipon ang mga mamamayan upang talakayin ang mahahalagang bagay, makisali sa debateng pampulitika, magsagawa ng negosyo, at makihalubilo. Sa modernong konteksto, ang terminong Agora ay kumakatawan sa isang plataporma o espasyo kung saan malayang makapag-uusap, makapagdebate, makapagpalitan ng mga ideya, at makalalahok ang mga tao sa makabuluhang mga pag-uusap tulad ng nito.
Ang gawaing ito ay ideya at pinangunahan ni G. Albert Lagrimas, guro ng FIl111A, bilang bahagi ng pagpapalalim ng kaalaman ng klase kaugnay sa Sining ng Content Creation at mga hamong kinahaharap sa paglikha nito. Ang Fil 111A ay isa sa mga bagong asignatura na inaalok ng CLE o Center for Liberal Education ng College or Arts and Letters. Ang pagtatag ng CLE ng unibersad ay sa layuning mas patataganin at paghuhubog ng kabuuang pundasyon ng pagkatao at pagkatuto ng sinomang mag-aaral ng unibersidad.
Tinalakay sa dalawang araw na ito ng programa ang sining ng content creation at ang tama at etikal at tamang paggawa ng content batay sa 4Es - Educate o Magturo, Engage o Makipag-ugnayan), Entertain o Magbigay-aliw, at Empower o Magbigay-lakas, maging ang prosesong pinagdaraanan nito. At higit sa lahat ang responsableng pagbabahagi ng impormasyon at ang mahalagang papel ng wikang Filipino sa kasalukuyang paraan ng pakikipagtalastasan online.
Sa unang araw ng Agora ibinahagi ni G. Johan Kyle Ong na isa ng alumus ng unibersidad na may kursong Integrated Marketing at nakilala sa paggawa ng content sa Filipino Fashion, ang kanyang mga karanasan sa pagsisimula niya ng content creation. Nagbahagi siya sa klase na inorganisa ng block 4 sa pangunguna ng kanilang overall project head na si Bb. Riza Alana Phoebe Merencilla, mag-aaral sa 36YP ng MAHUM. Nag-iwan si Ginoong Johan ng apat na mahalagang payo para sa mga mag-aaral: “Be yourself, be delusional, be consistent, and find your purpose.” Higit sa lahat, ibinahagi niyang bago pumasok sa mundo ng paglikha ng content, napakahalagang unahin muna ang pagiging totoo sa sarili.
Sa ikalawang araw naman ng programa, ibinahagi ni G. Yukio Estrella, isang 3rd Year student mula sa kursong MEM at kilalang Fashion and Lifestyle Content Creator. Nagbahagi siya sa klase na inorganisa ng block 6 sa pangunguna ng kanilang overall project head na si Bb. Hailey Rochine Mekairi Mendoza, mag-aaral sa 36YP ng MSIE. Kasama rin niyang nagbahagi si Bb. Aira Miu, mag-aaral sa ikatlong taon ng MEM, at content creator tungkol sa mga sasakyan.
Ipinaliwanag ng dalawang tagapagsalita ang pagiging tapat at totoo sa pagpromote ng mga produkto o brand ay ang mismong pundasyon ng kanilang kredibilidad hindi lamang bilang content creator, kundi bilang isang mabuti at responsableng tao. Ipinaalala nila sa mga dumalo na hindi kailangang maging perpekto sa social media. Ang pagpapakatotoo sa sarili at sa kanilang mga viewers at followers ay nagdudulot ng mas kritikal na content na mas tinatangkilik sa internet.
Higit sa Akademikong Gawain: Ang Wikang Filipino bilang Kasangkapan ng “EduKampyon.” Ang AGORA ay higit pa sa isang kinakailangang kahingian sa paaralan. Nagsilbi itong malinaw na patunay ng intelektwalisasyon ng wikang Filipino kung paano ito nagagamit sa edukasyon, pampublikong komunikasyon, at sa digital na mundo. Naipakita ng kaganapan na ang ating wika ay isang buhay, malikhain, at epektibong instrumento upang makakonekta sa makabagong henerasyon ng mga manonood.
Pagtugon sa hamon ng digital na lipunan
Sa huli, kinatawan ng dalawang symposium ang mismong kahulugan ng pamagat nitong AGORA bitbit ang tema. Nagsilbi itong malayang palitan ng ideya at kaalaman upang ang bawat mag-aaral ay maging isang ganap na “EduKampyon,” isang indibidwal na hindi lamang naghahangad na lumikha ng content, kundi gumagamit ng sariling boses at edukasyon upang mag-iwan ng positibong epekto sa lipunan.
Sa pamamagitan ng patuloy na pagtangkilik sa wikang Filipino sa digital na espasyo, ang mga mag-aaral ng UA&P ay patuloy na makikipag-ugnayan at mag-aambag sa isang mas masigla, may layunin, at makabuluhang komunidad online.